Pas bastisjeve të zhvilluara në gjashtë lokacione në Zubin Potok, Policia e Kosovës ka sekuestruar sot sasi të ndryshme armatimi, pajisje të komunikimit si radiolidhje, një granatë dore, uniforma ushtarake si dhe 213 copë municion.
Sipas autoriteteve, provat e siguruara gjatë këtij operacioni dëshmojnë përpjekje të vazhdueshme për veprimtari të kundërligjshme, të cilat mund të rrezikojnë sigurinë dhe stabilitetin në vend.
Institucionet e sigurisë kanë bërë të ditur se do të reagojnë me vendosmëri ndaj çdo individi apo grupi që përmes veprimeve kriminale paraqet kërcënim për rendin kushtetues dhe sigurinë e qytetarëve.
Rendi, ligji dhe siguria në Republikën e Kosovës mbeten prioritet institucional, ndërsa çdo veprim që cenon këto parime do të trajtohet me seriozitet maksimal dhe pa kompromis.