Më shumë se një orë ka zgjatur sot takimi mes grupeve punuese të Lëvizjes Vetëvendosje dhe Lidhjes Demokratike të Kosovës, transmeton Gazeta Metro.

Përfaqësuesi i këtij grupi punues të LDK’së, Arben Gashi para gazetarëve, tha se kanë diskutuar mbi disa tema që kanë të bëjnë me sigurinë e brendshme dhe të jashtme, për sundimin e ligjit, vetingun dhe dekriminalizmin.

“Temat që janë diskutuar për sigurinë e jashtme për ushtrinë, për sigurinë e brendshme, sundimin e ligjit, vetingun dekriminalizimin, për këto kemi një dakordim. Po ashtu, kemi diskutuar për ligjin për krime lufte, Ligjin për konfiskim të pasurisë së paarsyetuar”, tha Gashi.

Tutje, Gashi ka folur edhe për rolin që do të ketë Lutfi Haziri nënkryetar i LDK-së, në këto bisedime, ai tha se grupin punuese e cakton Isa Mustafa.

“Haziri është nënkryetar i LDK-së, dhe i cili ka rolin  vet edhe në mënyrën e vet si Lidhja i trajton çështjet, sa i përket takimit Osmani-Kurti ka qenë takim pune për të cilin duhet të dakordohen ata dy. Këto negociata për momentin janë duke u zhvilluar në nivel tematik, shkojnë njerëz që më shumë janë të angazhuar më shumë në tema të cilat diskutohen. Zotëri Mustafa përcakton grupin e vetë, kryetari dhe nënkryetarët e LDK-së, dhe kryetari e nënkryetarët e VV-së do të jenë në nënshkrim të marrëveshjes”, ka thënë ai.

Për qëndrimin e LDK-së karshi Gjykatës Speciale, Gashi tha se dhomat e posaçme të kësaj gjykatë duhet të vazhdojnë punën e tyre.Takimi i radhës u bë e ditur se do të ndodhë të hënën./gazetametro.net