Një video e publikuar në Facebook, ku shihej një armë pranë një të riu, ka vënë në lëvizje Policinë në Mitrovicë. Hetuesit kanë bastisur shtëpinë e 26-vjeçarit, por nuk kanë gjetur armë apo sende të tjera të dyshimta, ndërsa ai ka zgjedhur të mbrohet në heshtje gjatë intervistimit.
Sipas informacioneve që ka siguruar Sinjali, bëhet fjalë për E. G., 26 vjeçar, ndaj të cilit është iniciuar rast për dyshimet e posedimit të paautorizuar të armëve.
Rasti është raportuar të mërkurën, më 11 nëntor, rreth orës 16:00, në Mitrovicë.
Gjithçka ka nisur pas publikimit të një videoje në profilin e tij në Facebook, ku në ulësen pranë tij vërehej një objekt që dyshohej se ishte armë zjarri.
Modeli dhe lloji i armës së dyshuar nuk janë identifikuar, ndërsa vendndodhja ku ishte realizuar videoja mbetet e panjohur.
Pas sigurimit të informacionit, Policia ka kontaktuar Prokurorinë dhe, me urdhër gojor të gjyqtarit të procedurës paraprake, ka kryer bastisje në shtëpinë e 26-vjeçarit, në rrugën “Sami Gashi”.
Megjithatë, gjatë kontrollit nuk është gjetur asgjë e dyshimtë.
I riu është intervistuar nga hetuesit policorë, por ka shfrytëzuar të drejtën për t’u mbrojtur në heshtje, pa dhënë deklarime lidhur me rastin.
Me udhëzim të Prokurorisë, ndaj tij është iniciuar procedura për veprën penale “Mbajtja në pronësi, kontroll ose posedim të paautorizuar të armëve”.
Pas intervistimit, Gashi është liruar në procedurë të rregullt, ndërsa hetimet po vazhdojnë.