Mungesa e barnave esenciale në institucionet publike shëndetësore po vazhdon të rëndojë mbi pacientët dhe familjarët e tyre, të cilët, përveç përballjes me sëmundjet e rënda, po detyrohen të sigurojnë vetë edhe terapinë e nevojshme.
Një ankesë e bërë publike nga familjarët e pacientëve në Mjekimin Intensiv Qendror nxjerr në pah gjendjen me të cilën po përballen ata. Sipas tyre, shpenzimet për barna arrijnë deri në 90-100 euro në ditë.
“90-100 euro po duhet me ble ilaçe çdo ditë, na rrjepen!”, thuhet në ankesën e familjarëve, të cilët shprehin shqetësimin edhe për mungesën e ampulave të kaliumit, një preparat bazik që luan rol të rëndësishëm në funksionimin e zemrës.
Veçanërisht shqetësuese është se ampulat e kaliumit janë pjesë e Listës Esenciale të Barnave dhe, rrjedhimisht, duhet të sigurohen nga institucionet shtetërore.
Ndërkaq, një tjetër barrë financiare për familjarët mbetet edhe antibiotiku i shtrenjtë “Tygacilin”, i cili nuk përfshihet në Listën Esenciale, por u nevojitet disa pacientëve që po trajtohen për muaj të tërë në Mjekimin Intensiv Qendror.
Kjo situatë ngre pikëpyetje serioze për menaxhimin e furnizimit me barna në sistemin publik shëndetësor dhe përgjegjësinë e institucioneve për të garantuar terapinë bazike për pacientët.
Ndërsa Qeveria Kurti vazhdon të jetë përgjegjëse për politikat shëndetësore në nivel qendror, familjarët po përballen me një realitet të rëndë: në momentet kur të afërmit e tyre luftojnë për jetën, ata duhet të shqetësohen edhe se ku t’i gjejnë paratë për barnat.
