Një burrë në Britani është dënuar me burg pasi mbajti trupin e nënës së tij në një frigorifer për gati tre vjet, ndërsa vazhdoi të merrte përfitimet e saj sociale.
Christopher Phillips, 60 vjeç, e kishte vendosur trupin e nënës së tij, Silvia Phillips, 89 vjeçe, në një frigorifer të madh në dhomën e ndenjes së shtëpisë së tyre në Porthcawl, Uells.
Ai kishte pranuar fajësinë për pengimin e varrimit të ligjshëm dhe dinjitoz të nënës së tij, si dhe për dy raste mashtrimi, pasi nuk kishte njoftuar Departamentin për Punë dhe Pensione dhe autoritetet lokale për vdekjen e saj.
Gjykata në Merthyr Tydfil e dënoi atë me 2 vjet e 4 muaj burgim.
Gjatë seancës, gjyqtari Lloyd-Clarke tha se Phillips kishte vazhduar të merrte recetat e nënës së tij dhe kishte mashtruar profesionistët shëndetësorë duke pretenduar se ajo nuk dëshironte të merrte pjesë në kontrolle mjekësore.
Sipas gjykatës, pensioni dhe përfitimet e Silvias vazhduan të derdheshin në llogarinë e saj bankare, të cilën djali i saj kishte qasje ta përdorte. Në total, ai kishte përfituar rreth 78 mijë funte, raporton Metro, transmeton Klankosova.tv.
Phillips kishte lënë punën për t’u kujdesur për nënën e tij në muajt para vdekjes së saj, e cila ndodhi më 8 mars 2023. Shkaku i vdekjes nuk është përcaktuar.
Pas vdekjes së saj, ai bleu një frigorifer të madh dhe e mbajti trupin aty për gati tre vjet.
Gjyqtari tha se, edhe pse gruaja kishte pësuar “poshtërimin” e qëndrimit në frigorifer për një periudhë të gjatë, nuk kishte pasur dëmtime të tjera pas vdekjes.
Trupi i 89-vjeçares u zbulua nga policia pasi mjekët ngritën shqetësime për gjendjen e saj. Në momentin e gjetjes, ai ishte mbuluar me një batanije me motive leopardi dhe pranë tij ishin vendosur trëndafila dhe një kartolinë ditëlindjeje.
Në kartolinë shkruhej: “Për mamin, nga Christopher dhe Tina”, ku Tina ishte emri i qenit të familjes.
Gjykata dëgjoi se Phillips ishte birësuar nga Silvia dhe kishte pasur një lidhje shumë të afërt me të