Nga e hëna, dëshmitarë ndërkombëtarë do të dëshmojnë në mbrojtje të Thaçit dhe luftës së UÇK-së

Ky zhvillim në Hagë përbën një kthesë të rëndësishme për procesin, pasi dëshmitarët kanë pas vetes një histori të rëndësishme për të treguar – duke qenë akterë direkt në zhvillimet e viteve 1998–1999.

Të hënën nis një kthesë e rëndësishme në procesin gjyqësor kundër krerëve të Ushtrisë Çlirimtare të Kosovës.

Dëshmitarë me peshë ndërkombëtare, figura kyçe të luftës së Kosovës për liri, do të paraqiten në sallë – në anën e mbrojtjes së ish-presidentit Hashim Thaçi.

Interesimi për këtë fazë të re në Hagë është i madh.

Vetë Dhomat e Specializuara në Hagë kanë bërë të ditur se një numër i lartë njerëzish kanë kërkuar ta përcjellin seancën nga galeria e publikut, ngjitur me sallën e gjyqit.

Ende nuk është dhënë zyrtarisht asgjë për emrat e dëshmitarëve. Por nga ajo që dihet, ish-gjenerali i NATO-s, Wesley Clark, ish-kryeadministratori i Kosovës, Bernard Kouchner, ish-ambasadori William Walker, si dhe të tjerë – kryesisht nga Shtetet e Bashkuara dhe Britania – kanë pranuar të dëshmojnë në anën e mbrojtjes.

Ky zhvillim në Hagë përbën një kthesë të rëndësishme për procesin, pasi dëshmitarët kanë pas vetes një histori të rëndësishme për të treguar – duke qenë akterë direkt në zhvillimet e viteve 1998–1999.

Ata do të dalin përballë narrativës së Prokurorisë, e cila e cilëson UÇK-në si “Ndërmarrje të Përbashkët Kriminale”.

Dëshmitë e mbrojtjes pritet të zgjasin deri në mesin e nëntorit. Ndërsa deri në dhjetor, palët kanë afat të paraqesin me shkrim fjalët përmbyllëse. Pas këtij momenti, procesi hyn në fazën përfundimtare – ku paneli gjyqësor do të tërhiqet për të marrë aktgjykimin.

Para të hënës, më 14 shtator, mijëra qytetarë shqiptarë nga Kosova dhe diaspora do të mblidhen në një nga sheshet e kryeqytetit të Holandës – në një protestë përkrahëse për Hashim Thaçin, Kadri Veselin, Rexhep Selimin dhe Jakup Krasniqin.

Kanë kaluar gati pesë vjet që kur këto katër figura të larta të UÇK-së dhe të institucioneve të Kosovës mbahen në paraburgim. Seancat e shqyrtimit të procesit nisën më 3 prill 2023 dhe tashmë po shkojnë drejt përmbylljes.

I gjithë procesi është përcjellë me kritika të mëdha për shkelje te të drejtave të njeriut dhe për mungesë transparence.