Kryetari i PDK’së, Kadri Veseli, ka porositur ministrinë e Shëndetësisë që të rriten testimet për koronavirus në mënyrë që t’i jepet fund karantinimit, shkruan Gazeta Metro.
Veseli ka thënë se është meritë e qytetarëve që përhapja e koronavirusit në vend është relativisht e ulët dhe mos të ketë situatë të rëndë në vend.
Ai ka shkruar po ashtu edhe për 1 majin që ka gjetur qytetarët e izoluar në shtëpitë e tyre nga pandemia.
Postimi i plotë nga Veseli:
1 maji i këti viti na ka gjetur të izoluar si pasojë e pandemisë dhe në pamundësi për ta festuar masivisht në ambiente publike, sikurse është traditë në Kosovë. Pamja e rrugëve dhe shesheve të shkreta të Prishtinës në këtë periudhë, është me të vërtetë e trishtuar. Po ashtu, gjendja e dhjetëra mijëra punëtorëve të sektorit privat në këtë periudhë pandemie është shumë e vështirë.
Është për të ardhur keq që nuk mund të shijohen siç duhet këto ditë të pranverës, por njëherazi, është për t’u vlerësuar shkalla e lartë e durimit dhe përgjegjësisë që shoqëria kosovare po tregon. Merita më e madhe për nivelin relativisht të ulët të përhapjes së koronavirusit në Kosovë, iu takon qytetarëve tanë të cilët kanë dëshmuar ndërgjegjësim, përgjegjësisë dhe vetë-disiplimin të lavdërueshëm.
Qytetarët e kanë bërë pjesën që iu takon, duke u përkujdesur për higjenën si dhe duke qëndruar në shtëpi për të shmangur kontaktet sociale. Tani është përgjegjësia e institucioneve shtetërore, që të shtojnë testimet për t’i dhënë më shpejt fund karantinimit e për ta rikthyer sa më parë normalitetin në vend. Gëzuar 1 majin, me besimin që së bashku do ia dalim ta tejkalojmë këtë sfidë dhe me urimin që gjithë punëtorët të kthehen sa më shpejt në punë!//gazetametro.net