Një familje në Gjakovë dorëzoi në polici një zarf me 3.800 euro, të cilin e kishte gjetur në një institucion publik.
Sipas njoftimit të Policisë së Kosovës, më 6 gusht, qytetari I. Fetahu dorëzoi në Stacionin Policor në Gjakovë zarfin që ishte gjetur nga bashkëshortja e tij.
Pas verifikimeve, autoritetet konstatuan se shuma e parave ishte raportuar si e humbur më 4 gusht nga pronari i saj. Pas përfundimit të procedurave hetimore, u vërtetua se mjetet i përkisnin personit që kishte bërë raportimin dhe ato iu kthyen pronarit legjitim.
Policia e Kosovës ka falënderuar familjen Fetahu për ndershmërinë dhe bashkëpunimin e treguar, duke e cilësuar rastin si një shembull të përgjegjësisë qytetare dhe bashkëpunimit me institucionet e rendit.
