Kryetari i Lidhjes Demokratike të Kosovës, Lumir Abdixhiku, ka prezantuar listën finale të kandidatëve për deputet nga radhët e LDK-së, për zgjedhjet parlamentare të 9 shkurtit.
Ajo që bie në sy është se Abdixhiku ka lënë jashtë liste deputetin aktual dhe ish-kryetarin e Komunës dhe të LDK-së në Podujevë, Agim Veliun.
Kjo ishte e pritshme për Agim Veliun.
Për Periskopin Agim Veliu ka thënë se po mundohen me eliminu politikisht.
Ai madje thotë se nga LDK s’kanë mundur plumbat ta largojnë, e lëre më Abdixhiku.
“Ka qenë e pritur duke i pasë parasysh edhe rrjedhat e mëparme që kanë ndodh, edhe zgjedhjet partiake që janë mbajt në degën e Podujevës, ka qenë proces tepër i ulët i lënduar, me emërime jo me zgjedhje, me selektime dhe domethënë ky veprim i sotit e ka një histori. Fatkeqësisht kjo po ndodh, por të shohim, sigurisht ata po mendojnë që Agim Veliun mund ta eliminojnë nga politika e nga LDK, por mua nuk kanë mundur me më largu as forcat tjera më herët nga LDK as plumbat, e lëre më Lumir Abdixhiku me shokët e vet, me kompaninë e vet”, u shpreh ai për Periskopin.
Veliu për Periskopin ka thënë se qëllimi i Abdixhikut është me shkatërru degën më të fuqishme në Kosovë, por ai shprehet i bindur se do ta rikthejë.
“Qëllimi i tyre është me shkatërru një degë me veglën Ekrem Hysenin, e që ka qenë dega më e fuqishme në Kosovë, mirëpo unë jam i bindur që dega atje ka fuqi edhe intelektuale edhe politike dhe sigurisht do të vijë dita që do ta rikthej namin që e ka pasë dikur si dega më e fuqishme në Kosovë”, u shpreh për Periskopin.
