Universiteti i Prishtinës, përmes një komunikate për media ka deklaruar se distancohet nga veprimet e profesorit Ardian Kastrati, i cili dje u kritikua ashpër për postimin e tij.
UP tha se ndjek me shqetësim situatën e krijuar nga shkrimi i publikuar, por tha se si institucion më i madh i arsimit në vend, kërkon që personeli të kenë kujdes me sjelljet, qëndrimet, deklaratat e tyre.
Komunikata e plotë nga UP:
‘’Universiteti i Prishtinës “Hasan Prishtina” njofton se ka ndjekur me shqetësim situatën e krijuar si pasojë e një shkrimi të publikuar dje në llogarinë e tij në facebook nga z. Ardian Kastrati, profesor asistent në Fakultetin Filozofik të UP-së.
Universiteti i Prishtinës ka mirëpritur krijimin e institucioneve të reja dhe shpreson në stabilizimin e rrethanave politike në vend. Por, në situatën e krijuar nga rasti i lartpërmendur, UP-ja njofton opinionin që, si institucioni më i madh i arsimit të lartë në vend, kërkon nga personeli i tij, që pavarësisht institucionit ku janë të angazhuar, me sjelljet, qëndrimet dhe deklaratat e tyre, të ruajnë imazhin e UP-së.
Në këto rrethana, UP-ja distancohet nga deklarata individuale e profesor Kastratit si dhe dënon fuqishëm gjuhën denigruese të përdorur.
Në suazat e përgjegjësive të veta statutare, UP-ja, në ditët në vijim, do ta trajtojë rastin në fjalë, në përputhje edhe me ligjet në fuqi.