Trepça fiton në përballjen e vështirë ndaj Pejës

Trepça e ka fituar ndeshjen e vështirë ndaj Pejës të zhvilluar të enjten mbrëma dhe e ka mbajtur hapin me liderin Bashkimin, për vendin e parë në stinorin e rregullt të Superligës së Kosovës në basketboll.

Mitrovicasit në “Karagaçi” para një numri të madh shikuesish pejanë, nuk patën telashe dhe fituan me rezultatin 78:73.

Ishte fitorja e 18-të për Trepçën që ka edhe nëntë humbje. Pas 27 ndeshjeve të luajtura, Trepça ka 45 pikë, kurse Peja ka 41 pikë, aq sa ka edhe Ylli.

Mysafirët krijuan epërsi prej shtatë pikësh në çerekun e parë, të cilin e fituan 25:18, ndërsa në pushimin e gjatë shkuan me katër pikë dallim, 43:39, pas paraqitje së mirë të Pejës në periudhën e dytë.

Çereku i tretë ishte i barabartë 17:17.

Në periudhën e katërt, Trepça ishte më e koncentruar në sulm e në mbrojtje, për triumfin e radhës.

Më i dalluari në fitore tek ekipi i drejtuar nga trajneri Adis Beqiragiq, Trepça, ishte Tekele Cotton.

Cotton e mbylli ndeshjen me 24 pikë, pesë kërcime e një asistim.

Michael Myers Jr i kishte 12 pikë, gjashtë kërcime e tri asistime, ndërsa Drilon Hajrizi kontribuoi me 14 pikë e katër kërcime.

Koshashënuesi më i mirë te Peja ishte Marquez Towns me 16 pikë, dy kërcime e pesë asistime, kurse statistikat më të mira i pati Darryl Morsell me 15 pikë, dy kërcime e një asistim.

Në ndeshjen e fundit të stinorit të rregullt, Trepça përballet me Borën që tashmë do të luajë në plejaut.

Ndërkohë, Peja do të ketë tjetër përballje të vështirë. Luan në udhëtim te Bashkimi.