Xhelal Sveçla, ministër i Brendshëm, është deklaruar rreth serbit i cili u raportua i zhdukur pak ditë më parë, dhe që i njëjti sot u gjet pa shenja jete në kanalin e Ibër Lepencit.
Ministri tha se, Policia e Kosovës në bashkëpunim me Agjencinë e Menaxhimit Emergjent e kanë trajtuar me seriozitet njoftimin e zhdukjes së serbit.
Po ashtu, Sveçla, ka përgëzuar zhytësit e Njësisë Speciale Intervenuese të Policisë, për profesionalizimin e treguar.
Postimi i plotë:
Pas raportimit në Policinë e Kosovës për zhdukjen e një qytetari të komunitetit serb në fshatin Zupç të Zubin Potokut, Policia e Kosovës në bashkëpunim me Agjencinë e Menaxhimit Emergjent kanë trajtuar me seriozitet njoftimin e zhdukjes së tij me dyshimin për rënie në kanalin e Ibër Lepencit, rrjedhë e Liqenit të Ujmanit.
Sot, zhytësit e Njësisë Speciale Intervenuese të Policisë dhe ekipi i AME-së pas një pune me shumë përkushtim, kanë gjetur trupin e pajetë të qytetarit në një nga tunelet e këtij kanali.
Përgëzoj pjesëtarët për profesionalizmin e treguar, falënderoj përgjegjësit e Ndërmarrjes Publike “Ibër Lepenc” për bashkëpunimin ndërsa familjes së të ndjerit i shpreh ngushëllimet e mia. Hetimet do të vazhdojnë deri në zbardhjen e të gjitha rrethanave të vdekjes së tij.
