Rasti i parë u konfirmua sot në Kosovë, infektologu tregon për simptomat e “Etheve të Nilit”

Sot në Kosovë është konfirmuar zyrtarisht rasti i parë me “Ethet e Nilit”. Për këtë virus ka folur infektologu, Hamdi Ramadani.

Ai tha se simptomat janë të përafërta me gripin ose me COVID-19.

“Mbi 80 për qind të rasteve e kalojnë në formë të quajtur të lehtë ose asimptomatike, që në mjekësi kjo njihet si subklinike, dhe vetëm një detektim laboratorik specifik mund ta verifikojë sëmundjen”, tha Ramadani në Klan Kosova.

Pas konfirmimit të rastit të parë, Instituti Kombëtar i Shëndetësisë Publike ka dhënë detaje.

IKShPK-ja njoftoi se pacienti fillimisht ka qëndruar në Shëngjin e më pas edhe në Ulqin, derisa pas kthimit nga Ulqini i janë shfaqur simptomat.

“Pacienti nga data 27.06.2024 deri më 29.06.2024 ka qëndruar në Shëngjin-Shqipëri, ndërsa nga data 13.07.2024 deri më 22.07.2024 ka qëndruar për pushime në Ulqin. Simptomat i janë paraqitur menjëherë pas kthimit nga Ulqini. Pacienti është duke u trajtuar në Klinikën Infektive të Qendrës Klinike Universitare të Kosovës”, njoftoi IKSHP’ja.