Ende pa zbardhur dita, në Trebice të Leposaviqit policia konfiskoi 272 pajisje të ndryshme që prodhonin Bitcoin, dhe arrestuan pronarin e tyre.
Ky lajm i aksionit të njësive speciale e doganës u prit mirë nga banorët në Jug të Mitrovicës, por disa nga ta i pranuan televizionit se merren edhe vetë me prodhimin e kriptovalutave, të cilën veprimtari e ushtrojnë në komunat veriore. Kjo për shkak se nuk duhet ta paguajnë rrymën elektrike, mungesa e së cilës është edhe arsyeja që qeveria ndaloi këtë veprimtari, njofton Klankosova.tv
Ka nga ata që vlerësojnë se kultivimi i kriptovalutave duhet t’i lejohet të gjithëve, edhe nëse këta jetojnë në pjesën veriore, e rrjedhimisht nuk paguajnë rrymë.
Veç komunave veriore, që nga 4 janari kur qeveria ndaloi prodhimin e kriptovalutave, policia pati aksione edhe në pjesë tjera të vendit. Në Mitrovicën e Jugut sekuestroi 67 aparate.
