Paralajmërohet protestë tjetër në rast se ZRRE-ja nuk tërhiqet nga shtrenjtimi i rrymës

Me pankartat në duar “Jo rritjes së çmimit të rrymës”, “Ndal varfërimit të qytetarëve”, “S’ka dritë me padrejtësi”, “Stop vjedhjes me tarifa”, dhe thirrjet “Asnjë cent ma shumë”, nën organizimin e iniciativës “Asnjë cent më shumë” u protestua sot në Prishtinë për të shprehur kundërshtimin ndaj rritjes prej 15% të tarifave të energjisë elektrike.

Organizatorët e protestës kanë paralajmëruar të tjera protesta në rast se ZRRE merr vendim për shtrenjtimin për 15% të energjisë elektrike.

Besnik Shabiu nga “Asnjë cent më shumë”, paralajmëroi protesta të tjera edhe më të fuqishme në rast se kërkesat e tyre nuk do të realizohen.

“Kërkesa jonë ndaj ZRRE-së është të pezullohet vendimi për shtrenjtimin e energjisë për 15%. Deri të premten më 11 prill, kur ZRRE të merr vendim presim që institucionet të refketojnë dhe të heqin dorë. Hiqni dorë nga kjo ide e shtrnejtimit të energjisë ose do të përballeni me protesta masovike”, tha ai.

Kurse Ali Sefaj, tha se nuk do të lejojnë shtrenjtimin e rrymës.

“Jemi të vendosur, nuk shtyhemi asnjë hap më pas derisa t”i realizojnë kërkesat tona, nuk kanë të drejtë me shtrenjtu jetën tonë. Protestat tona do të masovizohen”, tha ai.

Zyra e Rregullatorit të Energjisë propozoi që çmimi i energjisë elektrike të shtrenjtohet për 15 për qind, duke nisur nga muaji prill i këtij viti. Një propozim i tillë u kundërshtua nga Presidenca.

Ndërkohë qeveria në detyrë propozoi një “rritje më të butë” të çmimit të rrymës.

Vendimi për shtrenjtimin ose jo të rrymës këtë vit pritet të merret më 11 prill, ndërsa tarifat e reja është thënë se do të mund të hynin në fuqi retroaktivisht nga 1 prilli, ose nga 1 maji. /Reporteri.net/