Mot i ndryshueshëm në fundjavë, IHK: Mund të ketë ndikim negativ në kulturat e hershme bujqësore

Instituti Hidrometeorologjik ka bërë të ditur se fundjava do të jetë me mot të ndryshueshëm, ndërsa ka udhëzuar bujqit dhe fermerët që të marrin masa preventive për të mbrojtur prodhimin dhe kulturat e ndjeshme nga ndikimi i këtyre kushteve të pafavorshme të motit.

IHK njofton se të shtunën parashikohet të mbajë mot kryesisht i vranët me intervale me diell.

Temperaturat do të jenë tipike për stinën e pranverës, duke krijuar kushte të favorshme për një sërë aktivitetesh.

Megjithatë, të dielën parashihet një ndryshim i shpejtë në shtresat e ulëta dhe të mesme të atmosferës (troposferë), i cili do të sjellë ulje të ndjeshme të temperaturave, si në vlerat minimale ashtu edhe në ato maksimale.

Fillimisht do të ketë reshje shiu, ndërsa më vonë pritet që reshjet të kalojnë në bore duke përfshirë edhe shumë pjesë të viseve të ulëta.

Megjithëse këto reshje do të jenë të përkohshme, gjersa në viset e larta parashihen vetëm reshje bore.

Kjo situatë meteorologjike do të krijojë kushte për paraqitjen e ngricave në fillim të javës së ardhshme, të cilat mund të kenë ndikim negativ në kulturat e hershme bujqësore, veçanërisht në pemëtari.

Udhëzohen bujqit dhe fermerët që të marrin masa preventive për të mbrojtur prodhimin dhe kulturat e ndjeshme nga ndikimi i këtyre kushteve të pafavorshme të motit.

IHK njofton tutje se për të shtunën temperaturat minimale do të variojnë nga 1°C deri në 3°C, ndërsa maksimalet do të arrijnë nga 14°C deri në 17°C.

Era do të fryjë nga verilindja me shpejtësi 1-5m/s.

Ndërkaq, të dielën temperaturat minimale pritet të jenë nga -1°C deri 1°C, ndërsa maksimalet e ditës do të lëvizin nga 1°C deri në 4°C.