Kurti i del në mbrojtje Dimal Bashës për artikullin anti-UÇK: Manipulohet një kapitull për të cilin ai s’ka faj

Kryeministri në detyrë, Albin Kurti ka komentuar kërkesën për dorëheqje të kryetarit të Kuvendit, Dimal Basha për shkak të një artikulli kundër UÇK-së për të cilit tashmë ky i fundit është distancuar.

Kurti i doli në mbrojtje Bashës, në punimin ku ai figuron si bashkautor.

Kurti tha se problemet që i ka sot Kosova nuk janë për shkak të një artikulli apo deformimi apo keqinformimi ku Basha as nuk është autor i tij, por siç tha ai problemi qëndron kur u themelua Zajendica, Lista Serbe, e kur qeveritë në Kosovë u formuan të varura nga Lista Serbe.

“Problemet që i kemi sot në Kosovë nuk i kemi për nga një deformim e keqinterpretim i një artikulli me bashkëautorësi, ku ky nuk është autor i atij kapitulli të para më shumë se një dekade. Problemet e kemi kur është nënshkruar ‘Zajednica’ në 2013, kur janë amnistuar kriminelët serbë në veri po ashtu në 2013, kur është votuar Gjykata Speciale në 2015, kur është themeluar Lista Serbe bashkë me Beogradin në 2013. Problemet i kemi kur politikanët e Kosovës kanë bërë qeveri duke u varur nga Lista Serbe, apo kur kanë hyrë në pazare për ndarje të Kosovës, jo te ky artikull ku manipulohet një kre për të cilin ky s’ka faj”, tha Kurti para mediave.

Kryetari i porsazgjedhur i Kuvendit të Kosovës, Dimal Basha, e ka distancuar veten nga një artikull që flet për ish-Ushtrinë Çlirimtare të Kosovës (UÇK).

“Dua të deklaroj me përgjegjësinë më të madhe qytetare dhe kombëtare që kurrë në jetën time nuk është shkruar dhe nuk do të gjendet asnjë përmbajtje që bie ndesh me vlerën e shenjtë të popullit tonë”, tha Basha dje në një konferencë për media.

Në anën tjetër nga OVL UÇK kanë kërkuar dorëheqjen e Bashës nga pozita e kryekuvendarit./reporteri.