Kryeministri Albin Kurti ka thënë se lëvizjet për ndryshimin e ligjit janë të ngutshme dhe të paanalizuara mirë.
Megjithatë, Kurti tha se do ta mbështetin ndryshimet e ligjit për Specialen në lexim të parë, por i tha PDK-së se duhet ta marrin përgjegjësinë.
“Ju kemi mbështetur me rezolutën në Kuvend, sot po ju mbështesim edhe me votën në lexim të parë”, u shpreh ai.
Megjithatë, ai theksoi se VV-ja nuk është e bindur për dobinë e projektligjit.
“Ne nuk jemi të bindur për dobinë e këtij Projektligji. Na keni thënë që këtë e mbështesin edhe ekipet mbrojtëse, andaj po ua mbështesim edhe ne”, deklaroi Kurti.
“Ka qenë një kohë e shkurtër për të analizuar ligjin, sidomos kur nuk e kemi aktgjykimin e prerë. Këto lëvizje për ndryshimin e ligjit për Specialen janë të ngutshme dhe nuk janë analizuar sa duhet. Veprime të ngutshme janë bërë edhe në vitin 2015. Atëherë nuk na keni dëgjuar, por sot do të duhej të na konsultoni. Zemërimi i qytetarëve është i drejtë. Ankesat për gjykatën duhet t’u drejtohen atyre që e themeluan e jo ndaj atyre që e kundërshtuan”, ka thënë ai.
