Telashet në familjet kosovare nuk kanë të ndalur. Përditë në Polici raportohen numër i madh rastesh, ku konfliktet mes bashkëshortëve shpesh përfundojnë edhe me dhunë fizike e psikike, për çka nevojitet ndërhyrja e Policisë. Një rast i tillë dyshohet se ka ndodhur dje në Prishtinë.
Këtë herë, një burrë kërkoi ndihmën e Policisë, duke e denoncuar bashkëshorten me të cilën janë në proces divorci.
Burimet e Sinjalit brenda Prokurorisë kanë bërë me dije se bazuar në dëshminë e viktimës, gruaja e tij ia ka pamundësuar të futet në shtëpinë e tyre të përbashkët, duke ia ndërruar cilindrin e derës.
Përballë kësaj situate, ai ka vendosur që ta raportojë, me ç’rast ka rrëfyer për konfliktin mes tyre.
Si rezultat i denoncimit, e dyshuara është intervistuar lidhur me rastin dhe ka dhënë deklaratën e saj.
Pas përfundimit të procedurave policore, me urdhër të Prokurorit të Shtetit, ndaj saj është iniciuar rasti për “Dhunë në familje”.
![](https://mitrovicasot.net/wp-content/uploads/2024/02/Ariani-Company-Banner-per-portale-Amina-Mitrovice-02-copy.jpg")
