KB Trepça, gjysmëfinalistja e parë e Kupës së Kosovës

Kampionia dhe fituesja në fuqi e Kupës së Kosovës në basketboll, ashtu siç pritej, ka avancuar në gjysmëfinale të garës.

Të mërkurën në ndeshjen kthyese, që po ashtu u zhvillua në palestrën “Sezai Surroi” në Prizren, Trepça fitoi ndaj Proton Cable Prizrenit me rezultatin 95:61.

Ndeshja e parë në Prizren ishte mbyllur 91:73 në të mirë të “xehetarëve”.

Dueli kthyes u desh të zhvillohej në palestrën “Minatori” në Mitrovicë, por për shkak të punimeve në parket, edhe ky ballafaqim u zhvillua në Prizren.

Trepça e dominoi ndeshjen dhe i fitoi të katër çerekët, 16:10, 21:17, 33:15 dhe 25:19, për të triumfuar në fund me 34 pikë dallim.

Dardan Kapiti kontribuoi në fitore me 10 pikë, 11 kërcime e një asistim, ndërsa Erion Kastrati pati 14 pikë, tri kërcime e dy asistime.

Me 14 pikë ndeshjen e mbylli edhe Mikaile Tmushiq.

Darryl Jordan te Prizreni i kishte 16 pikë e 9 kërcime, kurse Edmond Kryeziu pati 12 pikë, katër kërcime e dy asistime./koha.net