Hoti: S’ka arsye ekonomike të rriten tarifat e energjisë elektrike, tregjet kanë qenë dhe mbesin stabile

Deputeti i Lidhjes Demokratike të Kosovës, Avdullah Hoti ka thënë se nuk ka arsye ekonomike që të rriten tarifat e energjisë elektrike.

Në një postim në rrjetin social Facebook, ai ka thënë se tregjet e energjisë kanë qenë stabile dhe pritet që të mbesin njëjtë.

“E para, tregjet e energjisë kanë qenë stabile dhe pritet të mbesin të tilla, pasi nuk ka të ngjarë se do të ketë ndryshime në kërkesë dhe as në ofertë të energjisë. Kjo pasi është bërë progres i madh në tranzicionin energjetik të shumë vendeve të BE-së për t’u pavarësuar nga gazi rus, që nënkupton se është stabilizuar oferta për energji dhe ka siguri shumë më të madhe të furnizimit. Në anën tjetër, janë bërë investime madhore në shumë vende në efiçiencë të energjisë, të cilat investime së paku e kanë bërë më të moderuar rritjen vjetore të kërkesës për energji. Si rezultat, stabiliteti në ofertë dhe në kërkesë për energji pritet t’i mbajë çmimet e energjisë relativisht konstante” – ka shkruar ai.

Tutje, Hoti shtoi se nuk ka logjikë që ndërmarrjeve të energjisë elektrike vit pas viti t’u pranohen humbjet, dhe të përfshihen në tarifat që i paguajnë konsumatorët.

“E dyta, nuk ka asnjë logjikë që vit pas viti ndërmarrjeve të energjisë elektrike në Kosovë t’u pranohen humbjet, të cilat arrijnë në dhjetëra miliona euro, dhe të përfshihen në tarifat që paguajnë konsumatorët. Çdo vit miratohet plani i investimeve në rrjet, kostoja e të cilit llogaritet në tarifat që paguajnë konsumatorët. Prandaj, është e natyrshme që humbjet e llogaritura të energjisë në rrjet të reduktohen vit pas viti, e jo të mbesin të njëjta, aq më pak të rriten. Gjithashtu, është e ditur se pagesat nga ana e konsumatorëve për energjinë e konsumuar janë gjithnjë e më të rregullta, e cila gjë duhet të shpie në ulje të humbjeve të llogaritura dhe të reflektuara në tarifa”.