Ambasada e Francës në Prishtinë nesër do ta dorëzojë medaljen Komandant i Legjionit të nderit Qëndrim Gashi, ish-ambasador i Republikës së Kosovës në Francë.
Këtë njoftim e ka bërë vet ambasada e Francës në Kosovë, ku është thënë se medaljen do ta dorëzoj Marie-Christine Butel.
“Ambasada e Francës në Prishtinë ka kënaqësinë t’ju njoftojë se Ambasadorja Marie-Christine Butel, do t’ia dorëzojë të enjten, më 10 mars 2022, në ora 18:00 në Rezidencën e Francës, medaljen Komandant i Legjionit të nderit z. Qëndrim Gashi, ish-ambasador i Republikës së Kosovës në Francë”, thuhet në njoftim.
Sipas Ambasadës kjo medalje do t’i dorëzohet atij për merita të veçanta dhe veprime të dalluara të kryera nga Gashi.
“Aktivitetet e tij diplomatike kanë kontribuar në thellimin dhe intensifikimin e marrëdhënieve dypalëshe ndërmjet Francës dhe Kosovës Ceremonia do të zhvillohet në prani të familjes së tij, miqve, kolegëve dhe përfaqësuesve të autoriteteve franceze. Në këtë ceremoni janë të ftuar të marrin pjesë edhe mediat”, thuhet në fund të njoftimit.
Kujtojmë që në maj të vitit 2021, Qëndrim Gashi ishte liruar nga detyra e ambasadorit të Kosovës në Francë.
Me të ardhur në pushtet, Albin Kurti kishte shkarkuar disa nga ambasadorët e Kosovës në shtete të ndryshme.
Gashi ishte i vetmi që paraprakisht kishte kërkuar që të bëhet lirimi nga detyra e tij. /gazetametro.net
