Franca i jep mbështetje të plotë KFOR-it në Kosovë: Dezinformimi dhe manipulimi i informacionit po bëhen sistematike

Ambasadori i Francës në Kosovë, Olivier Guerot, ka theksuar se Parisi zyrtar do të vazhdojë ta mbështesë misionin e NATO-s në Kosovë, KFOR-in, me të gjitha kapacitetet e saj, duke nënvizuar se kjo mbështetje është e rëndësishme sidomos në një kontekst “ku dezinformimi dhe manipulimi i informacionit po bëhen sistematike.”

Komentet e Guerot vijnë pas një reagimi nga disa anëtarë të Lëvizjes Vetëvendosje, keqinterpretuan dërgimin e Forcës së Sigurisë së Kosovës në veri për një operacion kërkim-shpëtimi në Liqenin e Ujmanit duke retushuar fotografitë ku shihej edhe prania e KFOR-it në aksionin në të cilin mori pjesë FSK-ja.

Guerot ka falënderuar mediat kosovare për mbulimin e drejtë të rolit të KFOR-it, duke theksuar se ato kishin pasqyruar saktë “rolin e KFOR-it në përpjekjet për të gjetur trupin e personit të zhdukur në Liqenin e Ujmanit.”

“Që nga krijimi i saj, KFOR-i ka luajtur dhe vazhdon të luajë një rol të pazëvendësueshëm në garantimin e sigurisë për të gjithë. Ajo meriton respektin dhe mirënjohjen e të gjithë aktorëve në rajon,”, ka shkruar Guerot në një postim në platformën sociale, X.

France fully supports KFOR and its Commander. Since its creation, KFOR has played, and continues to play, an irreplaceable role in ensuring security for all. It deserves the respect and gratitude of all actors in the region. France will continue to provide it with all the…

— Ambassadeur Olivier Guerot (@Olivier_Guerot) July 29, 2025