Drejtoria e Inspekcionit në Mitrovicë dënon një subjekt afarist me gjobë prej 1000 eurosh

Drejtoria e Inspekcionit në Mitrovicë ka dënuar një subjekt afarist me gjobë prej 1000 eurosh, shkruan Mitrovica SOT

Gjoba është shqiptuar pasi pronari kishte paraqitur peshë joreale të bukës në gram, duke e deklaruar 450 gr dhe duke e shitur për 35 cent, por pas matjeve ka rezultuar se pesha reale e bukës në shitje është 357 dhe 368 gr.

Postimi nga faqja zyrtare e komunës së Mitrovicës:

Drejtoria e Inspekcionit shqipton gjobë në vlerë prej 1 mijë euro ndaj subjektit afarist në Mitrovicë
Në vazhdën e inspektimeve të vazhdueshme në subjektet afariste, inspektorët komunal nga sektori i tregut dje kanë shqiptuar gjobë në vlerë prej 1 mijë euro ndaj një subjekti afarist (qendër tregtare) me lokacion në qytetin e Mitrovicës.

Inspektorët komunal kanë potencuar se kjo gjobë është shqiptuar për arsye se produkti bukë 450 gr i vendosur për shitje me çmim prej 0,35 cent, nuk është përputhur me peshën e caktuar, pasi që gjatë matjes në peshore të kalibruar për produkte ka rezultuar se pesha e bukëve në shitje ka qenë 357 gr dhe 368 gr.

Me këtë rast ky veprim nga ana e inspektorëve është vlerësuar në kundërshtim me Ligjin Nr. 06/L-034 për mbrojtjen e konsumatorit, prandaj është shqiptuar edhe gjoba në vlerë prej 1 mijë euro për subjektin afarist nga inspektori i tregut.