Gjykata Kushtetuese mori vendim mbrëmë pro kërkesës së Lëvizjes Vetëvendosje rreth vlefshmërisë së votës së deputetit Etem Arifi për zgjedhjen e Qeverisë Hoti, me çka edhe zyrtarisht vendi do të shkojë drejt zgjedhjeve të reja të parakohshme.
Vota e deputetit Etem Arifi ishte vendimtare për zgjedhjen e Qeverisë Hoti më 3 qershor.
Nga Gjykata Kushtetuese u konstatua, se në bazë të nenit 71.1 të Kushtetutës të Republikës së Kosovës, në ndërlidhje me nenin 29.1 (q) të Ligjit për Zgjedhjet e Përgjithshme, personi i dënuar për vepër penale me një vendim gjyqësor të formës së prerë në tri (3) vitet e fundit, nuk mund të jetë kandidat për deputet e as të fitoj mandat të vlefshëm në Kuvendin e Republikës së Kosovës.
Me të publikuar informacioni se vendi do të shkojë drejt zgjedhjeve brenda një periudhe 40 ditore, të gjithë qytetarët thuajse u inkuadruan në rrjetet sociale për të filluar me ‘shakatë’ që lidhen me situatën politike institucionale.
Shumë prej tyre lidheshin me informacionin për rrëzimin e Qeverisë së udhëhequr nga Avdullah Hoti dhe faktin se ai s’do të jetë më kryeministër i vendit.
Nuk u lanë pa u përmendur as Agim Veliu, si ministër i Brendshëm dhe deklarata e tij e famshme “Shenjë s’ma ka lënë”, e as problemi që iu shfaqë Nismës Socialdemokrate për kalimin e pragut në zgjedhjet e kaluara, transmeton lajmi.net.
Padyshim nuk mbetën pa u ngacmuar me humor as ish-krerët institucional dhe ata të huaj të cilët në disa raste u morën nga afër me çështjet shumë të ndjeshme të shtetit të Kosovës.
Se çfarë do të ndodhë në vend me situatën politiko-institucionale, mbetet të shihet pas vendimit për zgjedhjet dhe paraqitjes së emrave të cilët do t’i kemi në listat e votimeve./Lajmi.net/
