Minatorëve të Trepçës u është rënduar gjendja shëndetësore e ku 50 prej tyre kanë kërkuar ndihmë mjekësore, ndërsa 3 të tjerë janë transportuar në Emergjencën e Spitalit rajonal të Mitrovicës.
Kështu tha për Gazetën Online Reporteri.net, Kryetari i Sindikatës së Minatorëve, Ibrahim Jonuzi.
I njëjti tha se greva po vazhdon dhe se minatorët janë unik e këmbëngulës deri në plotësimin e kërkesave të tyre dhe se ajo nuk do të ndërpritet.
“50 minatorë kanë kërkuar ndihmë mjekësore deri tani, ndërsa 3 prej tyre është dashtë të transportohen në Emergjencën e Spitalit rajonal të Mitrovicës. Greva po vazhdon deri në plotësimin e kërkesave. Janë shumë unik dhe këmbëngulës të kërkesave e minatorëve nuk ndërpritet”, tha ai për Reporteri.net.
Minatorët e kompanisë “Trepça” kishin kërkuar nga drejtoria që deri të hënën të merrnin pjesën e mbetur të pagave, në të kundërt do të futeshin në grevë. Të pakënaqur me ndërmarrjen metalurgjike janë edhe praktikantët të cilëve nuk u është paguar praktika.
Përpos praktikantëve, ndërmarrja “Trepça” për muajin shtator u ka mbetur borxh minatorëve më shumë se gjysmën e pagës bazë./Reporteri.net/
