Tre policë të Kosovës janë rrëmbyer sot nga njësitet speciale të Policisë së Serbisë.
Në mesin e tre policëve që u kidnapuan sot nga forcat serbe, është edhe Shemi Mustafa.
Ai në Policinë e Kosovës shërben që nga viti 2006, e në pikën statike që gjendej sot para se të kidnapohej po punonte nga aty, tash e dy muaj.
Kështu tregoi për KALLXO.com, Shpresa Mustafa, gruaja e tij.
Me lot në sy, ajo prapa kamerave shprehet e shqetësuar për situatën në të cilën gjendet.
E njëjta tregon se deri më tani nuk kanë pasur ndonjë thirrje nga ana e zyrtarëve shtetërorë.
“I kam disa familjarë të tjerë policë, ata janë këtu. Na ka vizituar edhe një komandat i Policisë” – thotë ajo.
Shpresa ka pesë fëmijë me Shemin, e njëjta tregon se ky i fundit, 62-vjeçar, ka edhe probleme shëndetësore.
“Është kanë edhe sëmurë, prej pushimit mjekësor ia ka nisur punën. Ka probleme me frymëmarrje” – thotë ajo.
Gruaja e policit të kidnapuar nga forcat serbe tregon se kontaktet me bashkëshortin e saj kur ai gjendet në punë i ka të vazhdueshme, edhe pse shpeshherë terrenet e vështira ia pamundësojnë të bisedojnë lirshëm.
“Sot nuk kemi folur hiç me të, tjera herë fol gjithë, e sot asnjëherë nuk është lajmëruar se nuk po kanë qasje atje, nuk kanë valë, sen hiç nuk kanë. Po kohë pas kohe ai del, lyp valë, i gjen e më lajmërohet. Sot, asnjëherë nuk është lajmëruar, prit po lidhet diku me më shkru, hiç sen”, – shprehet ajo.
Tre policë të Kosovës u kidnapuan sot në Leposaviq. Siç ka konfirmuar Policia e Kosovës, edhe vetë krerët e shtetit, policët gjendeshin brenda territorit të Kosovës.
“Njësia policore patrulluese e kufirit ka qenë me detyre në pikë statike në vendin e quajtur Tresave/Bare, thellë brenda në territorin e Republikës së Kosovës” – thuhet në komunikatën e Policisë.
Edhe ministri i Brendshëm, Xhelal Sveçla, ka konfirmuar diçka të tillë, e kryeministri Albin Kurti ka thënë se ata gjendeshin 300 metra në brendësi të territorit të Kosovës.
Drejtori i Zyrës për Kosovën në Qeverinë serbe, Petar Petkoviq, po pretendon se tre zyrtarët policorë që dyshohet se u kidnapuan nga policia serbe u gjetën në jugperëndim të Serbisë, rreth 10 kilometra nga kufiri me Kosovën.
Ai tha se pjesëtarët e policisë serbe nuk e kanë shkelur territorin e Kosovës dhe as rezolutën 1244.
Sipas tij, Serbia është e gatshme të ofrojë të gjitha provat dhe kërkoi hapjen e një hetimi ndërkombëtar, nëse është e nevojshme.
Mirëpo, Zëdhënësi i Policisë së Kosovës, Baki Kelani i ka quajtur të rrejshme deklarimet e drejtorit të Zyrës për Kosovën në Qeverinë serbe, Petar Petkoviq lidhur me këtë çështje.
“Ata janë zyrtarë kufitarë patrullues dhe nuk janë zyrtarë të njësiteve speciale, pra është një deklarim i rrejshëm i palës serbe. Ata janë tre zyrtarë policorë të moshës së shtyrë rreth 50 vjeçar apo edhe mbi. Që kanë shërbyer për vite me radhë në Policisë e Kosovës”– ka thënë ai.
Kelani ka deklaruar se policët e kidnapuar janë të moshës rreth 50 vjeç apo mbi.
Kelani ka thënë se janë të bindur që pjesa ku janë gjendur policët është thellë brenda territorit të Kosovës./Kallxo.com
