Nga KF Trepça në futbollin kroat, Florent Hyseni që po shkëlqen këtë sezon me ekipin Zmaj

5 gola dhe 3 asiste në 13 ndeshje janë shifrat të cilat i ka realizuar Florent Hyseni në Ligën e Tretë të Kroacisë, për ekipin HRNK Zmaj Makarska, gjatë sezonit vjeshtor të vitit 2022.

Gjatë sezonit të tij të parë, 19-vjeçari nga Mitrovica, në një intervistë për Gazetën Sinjali tregoi eksperiencën e tij në Kroaci dhe për punën të cilën e ka zhvilluar sa ishte pjesë e KF Trepçës, ku e vlerësoi se e ka ndihmuar shumë në rrugëtimin e tij drejt ekipeve evropiane.

“Punë në akademinë e Trepçës më ka ndihmuar shumë, jam i kënaqur që kam luajtur në një ekip profesional si Trepça, më ka ndihmuar të shkoj në Kroaci, në Makarska, në ekipin Zmaj, ku kam menaxher Naim Bahtirin, po ashtu jam i kënaqur edhe me trajnerat e mi që i kam pasur, Emin Baliqi dhe Shpëtim Fetahu” – u shpreh Hyseni për Sinjalin.

“Pingji” i njohur ndryshe nga shokët e tij, kishte pasur paraqitje të mira edhe në miqësoret e zhvilluara të KF Trepçës me ekipet si Fenerbahçe, Hajduk Split e Dinamo Zagreb, ku në ndeshjen kundër Hajdukut të Spliti kishte kontribuar me gol në fitoren e KF Trepçës.

Shpëtim Fetahu dhe Emin Baliqi ishin dy trajnerët të cilët Hysenin e kishin përcjellë që nga grupmoshat e hershme dhe kishin punuar me të. Baliqi e cilësoi Florentin si një punëtor dhe një futbollist me tipare të veçanta.

I pyetur se çfarë e ka dalluar Hysenin që të arrijë deri tek ky nivel, Baliqi u shpreh: “Florenti i ka disa veçori, zakonisht sulmuesit kërkohen, ka një forcë eksplozive, një qetësi para golit, ka disa tipare që janë të sulmuesve të veçantë që nuk është lehtë t’i krijosh dhe Florenti është ai i cili ka arritë që përmes punës së tij prej vogjëlisë e deri tash t’i tregojë aftësitë e veta, ndoshta jo në një rang shumë të lart të futbollit kroat, por të paktën është afër që prej aty të tregojë vlerat e tij dhe të ngjitet më lart.”

Për Hysenin disa fjalë i tha edhe menaxheri i tij dhe pronari i shkollës së futbollit të Trepçës, Naim Bahtiri, duke treguar se për talentin nga Mitrovica ka interesim qysh tash nga ekipe më të mëdha në Kroaci.

“Florenti është shumë punëtor i madh, super lojtar, ka kriju paraqitje të mira këtë sezon ku ka shënuar gola dhe asiste. Ka interesim prej klubeve të Ligës së Dytë të Kroacisë, klube të mëdha me emër, por njëherë për momentin këtë sezon do të mbetet aty.”

Puna e klubit KF Trepça përpos se ka nxjerrë një lojtar si Florenti, stafi i tyre kanë pritshmëri të mëdha edhe për lojtarët si Fatjon Bunjaku, Elmedin Rama, Endrit Emini, Bleond Rexhepi e disa të tjerë që konsiderohen si talentë dhe kanë potencialin të ndjekin rrugën e Hysenit apo edhe më lartë.

Hyseni sa ishte pjesë e Klubit Futbollistik Trepça, kishte pranuar ftesë dhe kishte pasur paraqitje edhe për Kombëtaren e Shqipërisë U-17 dhe për Kombëtaren e Kosovës U-19.

/GazetaSinjaliSporti/