Ambasadorët e vendeve anëtare të Bashkimit Evropian u pajtuan të mërkurën për t’i dhënë mandatin Këshillit Evropian të negociojë procesin e liberalizimit të vizave për Kosovën me Parlamentin Evropian.
Sipas këtij vendimi, lëvizja pa viza për personat që janë të pajisur me pasaportë të Kosovës do të jetë e mundur kur të hyjë në fuqi sistemi evropian i udhëtimit, ETIAS.
Data e mëtuar që ky sistem të aktivizohet është fillimi i muajit nëntor të vitit 2023.
E në rast se do të ketë vonesa për ETIAS, liberalizimi i vizave për Kosovën hynë në fuqi jo më vonë se më 1 janar të vitit 2024.
“Liberalizimi i vizave është bërë i mundur falë përpjekjeve të Kosovës për të forcuar kontrollin kufitar, për të menaxhuar migrimin dhe sigurinë. Ne besojmë se ky bashkëpunim i mirë vetëm sa do të forcohet në të ardhmen”, tha mes tjerash Jan Lipavsky, ministër i punëve të jashtme të Çekisë.
Republika çeke mban presidencën e Këshillit të BE-së deri më 31 dhjetor 2022.
Ndërkohë këtë detyrë, pra presidencën do e mbajnë për 12 muajt e 2023-ës, sipas sistemit të rotacionit me nga gjashtë muaj, së pari Suedia, e pastaj Spanja.