Shoqata e Gastronomëve të Kosovës ka reaguar pas masave të reja të marra nga Qeveria sot, shkruan Gazeta Sinjali.
Ata përmes një postimi në Facebook kanë shkruar se i kundërshtojnë masat e reja kundër COVID-19. Sipas tyre të njëjtat masa janë marrë edhe nga Qeveria e kaluar kanë rezultuar të pakuptimta dhe joefektive.
“Masat nuk kanë kuptim që të kufizojnë veprimtaritë biznesore, por të stimulojnë vaksinimin e popullatës, si zgjidhja e vetme për daljen nga kjo krizë”, shkruhet në postimin e tyre.
Tutje ata kanë njoftuar se të hënën do të mbajnë mbledhje të jashtëzakonshme për të diskutuar masat e reja të vendosura nga ana e Qeverisë.
“Rrjedhimisht, ftojmë të gjithë anëtarët e SHGK-së, që të marrin pjesë në Mbledhjen e Jashtëzakonshme të Kuvendit, të hënën me dt. 25/10/2021 pranë Hotel Sirius në ora 14:00!”, shkruhet tutje në postim.
Kujtojmë se në masat e reja që kanë hyrë në fuqi sot specifikohet se maska do të vazhdojë që të jetë obligative për qytetarët e vendit.
Kufizimi i qarkullimit të qytetarëve do të jetë nga ora 00:00 deri në ora 05:00.
Edhe pas kësaj mbledhjeje Qeveria vazhdon që të ndalojë veprimtarinë e klubeve të natës si dhe organizimi i festivaleve, koncerteve, ekskursioneve, pelegrinazheve, dasmave, fejesave, ahengjeve familjare dhe shoqërore, në të gjithë territorin e Republikës së Kosovës.
