Diçka e rrallë në skenën politike kosovar po ndodh, Lëvizja Vetëvendosje po kërkon bashkëpunim dhe ndihmë nga Partia Demokratike e Kosovës për rrëzimin e Qeverisë Hoti, shkruan Gazeta Metro.
![](https://mitrovicasot.net/wp-content/uploads/2024/02/Ariani-Company-Banner-per-portale-Amina-Mitrovice-02-copy.jpg")
Lëvizja Vetëvendosje e ka kuptuar se pa bashkëpunimin dhe ndihmën e PDK’së vështirë se do ta kenë të mundur rrëzimin e Qeverisë Hoti, duke parë se AAK dhe Nisma janë në Qeveri.
Lëvizja Vetëvendosje po synon rrëzimin e Qeverisë Hoti nëpërmjet ngritjes së mocionit të mosbesimit. Nga sot Grupi Parlamentar i Lëvizjes Vetëvendosje nis mbledhjen e nënshkrimeve për procedimin e mocionit të mos besimit ndaj Qeverisë.
Si rrjedhojë e keqqeverisjes dhe situatës së rëndë me COVID-19, shefi i GP të VV’së Rexhep Selimi ka ftuar grupet tjera parlamentare dhe deputetët e parlamentit të Kosovës që ta mbështesin këtë mocion.
Deputeti Selimi pret reflektimin e PDK’së për rrëzimin e qeverisë Hoti. “Partia Demokratike e Kosovës është subjekt opozitar në Parlamentin e Kosovës, në retorikën e tyre kemi parë që ata kanë qasje kundrejt qeverisë aktuale. Ne presim që ata t’i mbajnë fjalët e tyre dhe t’i realizojnë me veprime konkrete”, tha Selimi.
Kujtojmë se më 25 mars të këtij viti ish- Qeveria Kurti ishte rrëzuar me ngritjen e mocionit të mosbesimit pikërisht nga LDK-ja, partneri i atëhershëm i saj.//gazetametro.net
