Kryeministri në detyrë, Albin Kurti ka reaguar një ditë pasi autoritetet serbe vendosën në karantinë dy komuna në veri të Kosovës. Sipas tij, ka qenë Ministria e Shëndetësisë së Kosovës ajo që e vendosi veriun në karantinë, por këtë nuk e bënë me ‘tupan’, shkruan Gazeta Metro.
Në një video të publikuar së fundi, Kurti thotë se politikanë në Serbi e Kosovë dëshirojnë konflikt në Veri të Kosovës për të realizuar planin për shkëmbim territorial.
“Ata duan të provokojnë tensione sepse ata duan incidente. Sepse projekti i tyre për shkëmbim territorial sikur të realizohej do të shkaktonte konflikte e gjakderdhje të reja. Ai projekt dështoi. Tash duan konlifkte e gjakderdhje në terren për t’u rikthyer te shkëmbimi e ndarja e Kosovës”, ka thënë ai.
Ai ka thënë se Ministria e Shëndetësisë e ka shpallur karantinën, e jo autoritetet e Serbisë.
“Së fundmi, është sërish Ministria e Shëndetësisë ajo që e ka shpallur karantinën edhe në dy komuna tjera: në komunën veriore të Mitrovicës dhe në komunën e Zvecanit, mirëpo nnuk kemi dashur ta bëjmë këtë gjë me tupan, në mënyrë që krizën shëndetësore të mos e thellojmë edhe me një tjetër. Ka pasur një dasmë në Zvecan para dy javësh, e cila e ka shkaktuar shpërndarjen e virusit Covid-19 atje”, tha Kurti.
Sipas Kurtit edhe ideja për gjendje të jashtëzakonshme është në funksion të kësaj ideje, teksa u ka bërë thirrje qytetarëve të ruajnë gjakftohtësinë. Për më shumë, ndiqeni videon e plotë të Kryeministrit në detyrë./gazetametro.net
