Pas pesë vitesh të një pushteti armiqësor ndaj sistemit të drejtësisë në Kosovë, kryetari i Gjykatës Supreme, Fejzullah Rexhepi, tha se presionet politike janë tejet shqetësuese. Për ta vërtetuar këtë, mjafton fakti që qeveria në detyrë as nuk e mori parasysh vendimin e Supremes që nuk e lejon një person të jetë edhe deputet edhe ministër ose kryeministër.
![](https://mitrovicasot.net/wp-content/uploads/2024/02/Ariani-Company-Banner-per-portale-Amina-Mitrovice-02-copy.jpg")
Në konferencën “Ditët e Gjyqësorit”, tha se presionet publike ndaj gjyqtarëve, përfshirë reagimet nga figura të larta shtetërore, paraqesin një shqetësim serioz sepse cenojnë pavarësinë e gjyqësorit dhe krijojnë perceptim të gabuar për vendimmarrjen.
Rexhepi theksoi se gjykatat duhet të jenë të lira nga çdo ndikim i jashtëm, në mënyrë që besimi i qytetarëve në drejtësi të mbetet i palëkundur.
Sipas kryetarit të Supremes, unifikimi i praktikës gjyqësore dhe zbatimi i njëjtë i ligjit në të gjitha nivelet janë themel i pavarësisë dhe cilësisë së vendimmarrjes. Tha se vetëm një sistem i qëndrueshëm dhe i harmonizuar juridikisht mund të garantojë transparencë dhe standarde të larta në gjyqësor.
Në anën tjetër, kryesuesi i Këshillit Gjyqësor të Kosovës (KGJK), Albet Zogaj, tha se gjatë vitit 2025 gjyqësori ka realizuar shumicën e zotimeve të marra për reformën e drejtësisë.
Ai tha se këto zotime tashmë janë pjesë e pakos së ligjeve, duke e çuar procesin reformues në nivelin më të avancuar deri më sot, raporton “Betimi për Drejtësi“.
Zogaj po ashtu nënvizoi se përmes dy letrave të zotimit me institucionet është bërë harmonizimi i ndryshimeve kryesore, ndërsa pakoja duhet t’i rikthehet Komisionit të Venecias për vlerësim final, në mënyrë që reforma të jetë plotësisht e përputhshme me standardet ndërkombëtare.