Pas mbylljes së komunës paralele të Skenderajt në veri të Mitrovicës, Tëvë1 ekskluzivisht ka siguruar se në veri të vendit operojnë ende strukturat paralele, asaj të Drejtorisë për Kulturë Rini dhe Sport, Drejtoria për Pagesat e Tatimit. Ndërkaq, në lagjen e Boshnjakeve, gjendet edhe ndërtesa katër kat, e cila vepron herë pas here në kuadër të komunës paralele serbe të Vushtrrisë, e afër saj gjendet objekti i ashtuquajtur zyrë e Serbisë për Kosovë përmes së cilës janë marrë të gjitha vendimet për komunat paralele, siç ka mësuar televizioni, kryetar i kësaj zyre është ish-kryetari i Zveçanit, Vuçina Jankoviq.
Tash e 25 vjet një objekt ka kryer shërbime në kundërshtim me Kushtetutën e Kosovës.
Për herë të parë televizioni sjell pamjet e këtij objekti, nga i cili janë menaxhuar të gjitha komunat paralele serbe që kanë operuar dhe janë duke vepruar në Komunën e Mitrovicës së veriut.
Për çfarë shërbeu objekti?
Ndërtesa katër katëshe, sipas burimeve të televizionit, po kryen shërbime sipas kërkesave të cilat vijnë nga Serbia.
Televizioni mëson se kjo ndërtesë është në kuadër të ashtuquajturës komunë paralele serbe e Komunës së Vushtrrisë.
Brenda saj, gjenden disa nga drejtori paralele serbe, duke nisur nga ajo e Kulturës, Qendra për Punë Sociale, dhe ajo e Shërbimeve Publike.
Jo vetëm kaq, ngjashëm po veprohet edhe në një ndërtesë afër Komunës së Mitrovicës së Veriut, ku të martën ekipi i televizionit pa nga afër punonjësit e strukturave paralele serbe, të cilët kryejnë shërbime në kuadër të drejtorisë komunale për tatim.
E pak metra më lartë, televizioni, ekskluzivisht ka pamje të komunës tjetër paralele serbe e cila është duke operuar mbi lokalin e Komisionit Komunal Zgjedhor.
Që punonjësit serbë të mos vërehen, aktivitetet e tyre po i kryejnë mbrapa këtij objekti banesor, ku sa qëndroi televizioni pa lëvizjet e tyre duke kryer shërbime.
Kryesuesi i Kuvendit Komunal të Mitrovicës së veriut, Nexhat Ugljanin thotë se ende nuk ka kërkesë nga Ministria e Administrimit të Pushtetit Lokal për të vepruar në mbylljen e tyre, por, ai konfirmoi se në to po kryhen shërbime të kundërligjshme.
“Siç e paralajmëruat edhe ju, ekzistojnë ende do struktura paralele por ato janë por ato janë në objekte private të cilat janë shfrytëzuar dhe po shfrytëzohen në mënyrë ilegalisht. Siç e keni pa në ato vende janë funksionalizim, disa nuk janë”, tha Ugljanin.
Ugljanin paralajmëroi mbylljen e këtyre drejtorive të strukturave paralele serbe.
“Sigurisht, hap pas hapi do të mbyllën edhe këto institucione paralele. Në kohën e duhur shumë shpejt do të ndërmerren hapa sepse nëse vjen kërkesa në kuadër të kuvendit, sigurisht ne do t’i marrim hapat konkret do t’i shfuqizojmë çdo mënyrë ilegale që funksionon në pjesën veriore”, tha ai.
Ditë më parë, Policia e Kosovës mbylli komunën paralele serbe të Skenderajt e cila ka operuar në veri të Mitrovicës afër stacionit të Policisë. /teve1.info/
