Ministrja e Ekonomisë, Artane Rizvanolli, e shoqëruar nga zëvendësministrat Getoar Mjeku e Nenad Stanojeviq dhe deputetja Arjeta Fejza, vizitoi ndërmarrjen Trepça, shkruan Mitrovica SOT
Vizita e saj vjen pas pakënaqësive të minatorëve me kushtet e punës si shkak i të cilave pati edhe greva nga ana e tyre.
Rizvanolli tha se investimet e planifikuara, pajisjet e punës, mbrojtjes e sigurisë janë prioritet i Qeverisë.
Postimi i plotë:
Bashkë me Zëvendësministrat Getoar Mjeku e Nenad Stanojević dhe Deputeten Arjeta Fejza sot vizituam ndërmarrjen e Trepçës dhe Minierën e Stan Tërgut.
Në Horizontin X takuam Fisnikun, Naserin e kolegët e tyre që punonin në nxjerrje të mineralit e mirëmbajtje të makinave të stërvjetruara.
Ishte përjetim i veçantë të flasim me ta për së afërmi e të përjetojmë ambientin e vështirë të punës që për minatorët është përditshmëri, por ishte edhe frymëzuese të shohim vullnetin dhe zellin e tyre për punë.
Së bashku me Kryesuesen e Bordit të Ndërmarrjes, Rrezarta Pllana, Kryeshefin Ekzekutiv, Bashkim Kurti dhe Drejtorin e Njësisë, Shyqri Sadiku i siguruam ata që në investmet e planifikuara në Trepçë, pajisjet e mjetet e punës, sigurisë e mbrojtjes për minatorët do të jenë prioritet.
Përkundër sfidave, Trepça ka nevojë që të gjithë të punojmë të unifikuar për të mirën e ndërmarrjes për ta sjellë Trepçën aty ku e meriton, si bosht i zhvillimit ekonomik e shoqëror të Mitrovicës dhe tërë atij rajoni.
Bordin dhe të gjithë ata që kontribuan në këtë periudhë të vështirë për ndërmarrjen i falënderova, e menaxhmentit të ri u urova sukses