Sot shënohen 27 vite nga rënia heroike e dëshmorit të kombit, Shemsi Istrefi, në Betejën e Melenicës më 27 prill 1999, gjatë luftës së lavdishme të Ushtrisë Çlirimtare të Kosovës.
Shemsi Istrefi, i lindur më 20 gusht 1977 në Vushtrri, rridhte nga një familje me tradita atdhetare, të njohur për qëndresë ndaj okupatorit.
Arsimin fillor e kreu në shkollën “Zija Prishtina”, ndërsa të mesmen në “Muharrem Bekteshi”, në degën e elektroteknikës.
Që në rini u angazhua në protestat kundër pushtuesit dhe u bë pjesë aktive e lëvizjes çlirimtare.
Më 15 korrik 1998, iu bashkua radhëve të UÇK-së, në Brigadën 141 “Mehë Uka” të Zonës Operative të Shalës, ku shpejt u dallua për guxim dhe përkushtim.
Mori pjesë në shumë beteja të rëndësishme, përfshirë ato në Kutllovc, Sumë, Trepçë, dhe Rahovë ndërsa u bë pjesë e Njësisë Speciale, ku shquhej për trimëri dhe angazhim të pandalshëm në vijën e parë të frontit.
Luftë pas lufte erdhi edhe 26 prilli i vitit 1999, kur u zhvillua një luftë e ashpër, në të cilën ranë shumë trima të lirisë.Ishte kohë e luftimeve dhe ai qëndroi në pozicione. Gjatë tërë natës luftuan pa u ndalur derisa ra, më 27 prill të vitit 1999.
Shemsi Istrefi mbetet simbol i sakrificës dhe guximit për lirinë e Kosovës.
Familjes së dëshmorit, Shemsi Xhafer Istrefi i ka dhënë “Mirënjohje” Shtabi i Përgjithshëm i UÇK-së, Ministria e Mbrojtjes e Qeverisë së Përkohshme të Kosovës, Shtabi i Zonës Operative të Shalës dhe Kuvendi Komunal i Vushtrrisë.